连线Teen空 — 与青年病人沟通小贴士

在少年时期，除左返学以外，青年人大都过著打波打机追星无忧无虑嘅生活，但当疾病找上青年人，生活一下子全盘被打乱。多了一个「病人」身份嘅「青年人」，究竟治疗期间嘅佢哋有什么谂法？最关注什么？以下群组之间嘅对话，分享了「青年病人」面对嘅困难，小编亦提供了沟通小贴士，现在就让我哋一同起步，展开关心「青年病人」嘅第一步。

连线Teen空@返学篇

家长陈女士：
我最近认识到几位青年病人，佢哋有以下嘅担心：
「功课成绩会唔会追唔上？」
「我嘅身体和精神状况可以让我继续应付学业吗？」
「我系咪要休学？」
咁我哋可以点样回应？

小编
我哋可以先欣赏青年病人种种优点 ，例如关心自己嘅学业成绩、同时觉察自己嘅身体状态，并愿意向身边人分享自己忧虑等等。
对于一般嘅高中生来说，DSE或许已是一场硬仗，而就读高中嘅青年病人，又要面对治疗，同时又要应付DSE，压力更加大。
我哋可以与青年病人一齐订立短、中、长期计划，按身体舒适嘅节奏，一步一步地完成学习目标。家长亦可以与青年病人和校方一同探讨学业支援方案，例如进行课程调适或延伸测验评估时间，增加治疗中嘅青年病人对学业嘅掌控感。

小编
不妨跟青年病人说：
「不要责备已全力以赴的自己」
「未来，睇学历，亦会睇人生经历！学历成绩并非人生的唯一指标，人生态度，个人兴趣等都同样重要架。」

连线Teen空@社交篇

学校张老师：
原来青年病人在交朋结友上都遇到唔少困难，例如以下嘅难题：
「因为我之前休学，依家要做插班生，我好惊同学已经埋哂堆，我唔知点样识佢地」
「我讲唔讲俾同学知我患病？如果讲，讲几多？点样讲？唔知佢地点样睇我呢？」
我哋可以有咩建议俾佢地？

小编
我哋可以鼓励青年病人同父母、医护、老师、社工、临床心理学家等一齐商讨认识新朋友仔或透露病情嘅对策。与校方加强沟通，做好准备，有助佢哋重返校园。
无论系认识新朋友定系向同学透露病情，最紧要系先评估青年病人嘅身心状态系咪Ready，Ready先可以Get Set! Go架！如果青年病人Ready认识新朋友，佢哋可以由个人兴趣去打开话题，因为兴趣绝对系开心经历同埋美好回忆，仲容易建立共同话题添！呢个都可能系大朋友同青年人破冰嘅小贴士，大家不妨试下啦！

连线Teen空@家庭篇

家长黄先生：
我个仔系长期病患青年病人，呢段时间佢心情有时会好差，咩人都唔想见，佢同我讲「我身心都好，我只想抖下，咩都唔想做，唔想理屋企人同其他人」我哋又可以点做？

小编
容让青年病人有自己嘅个人空间，此时此刻让佢哋感受到家人一直守候在旁，并与佢哋同行，已经足够。同时家人都需要拥有喘息空间，大家就各自为自己创造一下「Me Time」！食吓嘢、听吓歌、煲吓剧，适时放松充充电！

小编
充电时，不妨听下青年病人推介嘅歌，例如其中一首歌叫做《Answer: Love Myself》，系由韩国男团唱架！好多个青年病人都表示呢首歌陪佢哋走过高山低谷，歌词表达咗「最重要的事情，其实系爱自己」。 # You've shown me I have reasons I should love myself… I'm learning how to love myself

小编的话
我系香港儿童医院病人资源中心社工苏姑娘，亦系呢篇贴文嘅小编。在我加入香港儿童医院工作前，过去多年亦是与青年人同行，提供青年工作服务。近日有位照顾青年病人嘅家长向我分享：「冇病嘅人要去理解患病人士嘅需要，难！成年人，要进入青年病人嘅内心世界，更难！！」虽然难，但相信我哋身边仍然有好多关爱青年病人嘅伙伴，包括佢哋既父母、照顾者、医护同事、师长、朋友、素未谋面嘅有心人，仲有你和我，都用紧不同形式，默默表达关心。就让我哋继续与青年病人连线，一齐为青年病人注入力量！